Contoh Naskah Drama 3 Orang

 Setting Teras, taman, ruang tunggu, halte, leput, atau dimana saja yang penting bisa menggambarkan tempat yang bisa dengan bebas orang berkumpul/nongkrong/ba tunggu.
Nampak dua orang, mereka sepertinya sedang menunggu. Yang satu sepertinya santai-santai saja,sedang yang lain agak cemas,nda sabaran.
Orang 1 :
(Mondar-mandir.) So dimana kata dia?!
Orang 2 :
Dimana jo ngana sukaaa…hahahahaa,, santai aja jo. Jadi orang sabaran dikit, nimbole so.
Orang 1 :
Hellooowww…hari gini SABAR, oh tuhan ambe jo pa dia..ngana bole mati jo deng sabar.
Orang 2 :
Perasaan qta nda pernah dengar orang mati lantaran sabar. Mar kalu orang mati lantaran nda sabar banya ta’ dengar, lia lai..
Orang 1 :
Ngana pe maksud orang ja mati cilaka di atas motor lantaran ja kase lari rupa gila, ato tu ja mati orang tikang di tampa ba gate Cuma lantaran kase ta buang minuman. Bukang lantaran nda sabar itu,,makang puji depe nama itu. Kong kappa torang so bacirita mati-mati dang, blum paskah tre’. Co ngana cek ulang p dia kalu so dimana.
Orang 2 :
Kage dia so mati cilaka kang
Orang 1 :
Biijjiiii
Orang 2 :
Mengambil HP dan berlagak batelpon. Tapi nda tasambung, tulalit. Ia berlagak mencari sinyal karena sepertinya sinyalnya bermasalah.
Orang 1 :
Kyapa?
Orang 2 :
Akh, nda tau le ni sinyal. Nda ta sambung-sambung e.
Orang 1 :
Akh, masa dunia so pe modern bagini, kong disini sinyal stengah mati. Ato ngana pe hp sto yang so dari jaman batu..
Orang 2 :
Adooo, enteng pandang ngana kang? Kalu soal hp up date trus qta kasiang. Cek merek dulu, BB.
Orang 1 :
Mo BB ke’, Toki Anjing Mati ke’, whatever. Skarang cari cara mo kontak pa dia.
Orang 2 :
Kong qta mo bekeng bagimana dang, faktanya sinyal disini mati-mati.
Orang 1 :
Memang dang ni PLN nda puas sto kang dorang ja bermain akang tu lampu,, kong sinyal le dorang le mo bermain akang.
Orang 2 :
Toeng..Gudubrakk…
Orang 1 :
Dimana konter dekat-dekat sini.
Orang 2 :
Mo isi pulsa..? qta baru isi tadi 20, blum ta pake.
Orang 1 :
Bukang, mo pi suntik itu sinyal.
Orang 2 :
Woi biji, bukang sinyal yang mo pi suntik, ngana tu qta mo bawa pi suntik. Tenang kwa, kappa ngana so jadi bodok bagini dang. He napa, makang dulu ni coklat, sementara torang tunggu pa dia.
Keduanya pun diam, tempat itu menjadi tenang. Lalu terdengar  suara,bunyi di sekitar mereka. Ternyata tanpa mereka sadari, sedari tadi ada orang ditempat itu, yang dengan asiknya bersama dengan laptopnya.
Mereka pun lalu menghampiri orang tersebut.
Orang 2 :
Maaf, permisi.. apa ngana so dari tadi disini.
Orang 3 :
Io
Orang 1 :
Ngana ada sementara ba internet ini? Kok bisa?
Orang 3 :
Yah bisalah.. di era yang serba teknologi ini, apa so yang tidak bisa. Yang penting ada doi.
Orang 1 :
Woi..(ke orang 2) kiapa dia disini bole ba internet, kong tadi ngana di situ bilang nimbole ba telpon, lantaran sinyal lemah. Dua-dua pake sinyal toh.
Orang 2 :
(Menghampiri orang 1.) Dia ini orang kaya, jadi dia bole mo bli tu sinyal.
Orang 1 :
Bos..(mendekat ke orang 3.) dimana da bli akang tu sinyal. Supaya torang bole mo telpon torang pe tamang, mo cari tau kalu so dimana dia pe posisi skarang,somo kras le torang disini. Bole sto bos mo bantu akang.
Orang 3 :
Ada pulsa?
Orang 1 :
Ada bos. (ke orang 2) mana tu ngana pe hp. (orang 2 memberikannya) napa bos tu hp (ke orang 3)
Orang 3 mengambilnya berlagak batelpon. Beberapa saat kemudian terdengar nada panggil. Orang 1 sangat senang. Tapi telponya tak di angkat ato dijawab. Di coba beberapa kali tetap nda di angkat.
Orang 1 :
(Ke orang 2). Sudah jelas dia nda mo datang. Dia so tipu  pa torang. Memang depe tukang towo nda mo ilang-ilang.
Orang 2 :
Iyo. Paling kwa kai dia ada di warnet. Kalu nda main poker, ba uni film porno.
Orang 1 :
Iyo, memang Cuma itu noh dia ja bekeng kalu maso warnet. So itu depe moral rupa ngo’
Orang 2 :
Io, mo jadi apa kasiang ni bangsa kalu samua remaja pe kalakuang rupa dia.
Orang 3 :
Jang dulu katu torang capat-capat hakimi pa dia. Coba dia jadi ngoni, kong ngoni jadi ngo’…heheee,qidding e. Sapa tau katu dia masi di jalang ka kamar mandi, so itu dia nda angka tu telpon. Deng le jang talalu capat-capat torang hakimi ilmu pengetahuan dan teknologi itu, berdampak buruk bagi perkembangan kehidupan remaja. Misalnya internet bukan sedikit hal-hal positif,yang bermanfaat yang qta bisa dapat dari internet. Yang qta perlukan sekarang adalah KEBIJAKSANAAN dari masing-masing torang. Ketika torang mencoba membuka diri untuk iptek masuk dalam kehidupan torang. IPTEK mempunyai kesalahan tetapi hanya karena kesalahan orang yang memberdayakannya.
Orang 1 dan Orang 2 tercengang, waaaauuuuuwww….
Orang 3 : jang Cuma waaaaaaaaaauuuuwwwww…. Implementasikan.
Orang 1 dan Orang 2 :
86,hehehe…amin.
Orang 3 :
Kong abis ini ngoni mo kamana?
Orang 1 :
Somo pulang noh, bekeng apa leh mo tunggu pa dia.
Orang 2 :
Makaseh  neh bos, makase banyak. Torang bole mo dapa pencerahan hari ini.
Keduanya lalu meninggalkan orang 3.
Orang 3 :
(setelah kedua orang itu hilang dari pandangan penonton) terima kasih juga,telah mau melihat dan mendengarkan kebohonganku.
Masuk 2 orang perawat
Perawat 1 :
Sana dia, ambe tu suntik.
Perawat 2 :
Tangka pa dia, dusu padia…
Perawat dan Orang 3 bakudusu sampe kaluar panggung.

Selesai.

0 komentar:

Popular Posts

Pengikut